balken_stiftung

En servetsch da la natira e da la cultura

Grazia a l’extensiun cuntinuada da las instituziuns socialas statalas e privatas è sa spustà l’accent da las collectas pli e pli sin temas concernent cuntradas natiralas e cultivadas sco era sin l’istorgia e la tgira da monuments. Questa direcziun n’è dal reminent betg stada nova, mabain vegniva gia inditgada da collectas precedentas. Gia la collecta da l’onn 1933 è stada deditgada a la Lia svizra per la protecziun da la natira (oz Pro Natura) ed a la Lia svizra per la protecziun da la patria (oz Protecziun da la patria). Il 1941 ed il 1952 han las grondas societads istoricas da noss pajais profità da las collectas. Il 1964 è la collecta puspè ida a favur da l’Agid Svizzer per la Muntogna, il 1983 a favur dal Guaud svizzer. Il 1976 è stada deditgada ina part da la collecta a la tgira da monuments ed a la protecziun da la patria ed il 1992 è l’entir retgav ì a favur da la tgira dals maletgs dal lieu ed a la tgira da monuments. Dapi quel mument sustegna Pro Patria cunzunt il salvament, il mantegniment e la tgira da monuments architectonics e da cuntradas cultivadas.

Il 1. da schaner 1992 è l’uniun cun sia ritga tradiziun daventada la fundaziun svizra Pro Patria. Il num e la furma da l’organisaziun èn sa midads en il decurs dal temp. Ils gremis directivs èn però stads fidaivels fin oz a la finamira fixada dals fundaturs.

Attention: open in a new window. PrintE-mail