balken_sammlung

Giuventetgna svizra a l'exteriur

Dapi il 1923 trametta nossa fundaziun las ensainas dal 1. d’avust als Svizzers ed a las Svizras a l’exteriur e quai cun sustegn dal Departament federal d’affars exteriurs DFAE. Tar las festas naziunalas da las represchentanzas diplomaticas u da las uniuns svizras en l’entir mund vegn l’ensaina da la festa federala purtada cun luschezza e sco segn d’attaschadadad a la patria lontana. L’ensaina da quest onn è deditgada a la „tschintgavla Svizra“ e simbolisescha cun il glob terrester la preschientscha da nossas conburgaisas e da noss conburgais a l’exteriur. Per quest motiv ha il cussegl da fundaziun decidì da metter a disposiziun ina part dal retgav da quest onn a l’organisaziun da Svizras e Svizzers a l’exteriur per projects specifics. Ils daners van a favur da giuvnas e giuvens. Betg tut nossas conburgaisas e conburgais a l’ester stattan bain. Spezialmain la giuventetgna che viva en in ambient economicamain difficil ha strusch la pussaivladad da tegnair contact cun la Svizra u da segirar in fundament per returnar en la patria. Qua vuless nossa fundaziun als gidar en il rom da nossas pussaivladads.
L’auter accent metta la fundaziun per la segunda giada sin la cuntrada multifara dals museums svizzers. Sia finamira è da promover ils proxims onns ils museums locals e regiunals per intermediar lur collecziuns e lur savida. Nossa partenaria è l’Associaziun dals museums svizzers (AMS). La Posta accumpogna questa acziun cun ina seria da marcas postalas spezialas durant ils onns 2013 – 2015. Quest onn furneschan ils chantuns Giura, Basilea cuntrada, Lucerna e Tessin ils motivs.
Nus stuain admetter ch’il program da quest onn è ambizius. El è pussaivel be grazia a l’agid da voluntarias e voluntaris che gidan a collectar e grazia a las donaziuns da persunas solidaricas en Svizra ed a l’exteriur. Ad ellas in grond engraziament.

Carlo Schmid-Sutter, president da la Fundaziun svizra Pro Patria

Attention: open in a new window. PrintE-mail