La Pro Patria en il Grischun: in engaschament intensiv e variant per ils bains culturals en il pajais da las 150 valladas!
La Pro Patria sustegna il mantegniment e la tgira dals bains culturals en l'entira Svizra. Ch'ella è spezialmain activa en il Grischun sa resulta da la diversitad culturala da questa regiun. Il Grischun sco chantun il pli grond da la Svizra posseda in stgazi cultural d'ina ritgezza extraordinaria. Quella è d'attribuir surtut al reliev da la terra cun sias immensas differenzas d'autezza sur mar da quasi 4000 m (dal Piz Bernina a la planira da San Vittore), a la geologia, a la spessa rait d'auas cun trais sparta-auas europeics ed a la lunga isolaziun da bleras valladas periferas. Cun trais linguatgs naziunals, tschintg idioms rumantschs e divers dialects sa mussa questa ritgezza er en il sectur linguistic.

Ils davos 15 onns ha la Pro Patria sustegně radund 150 projects culturals da relevanza, en media pia 10 projects l'onn. Ils pli impurtants secturs d'engaschament èn la restauraziun da baselgias, chapluttas e d'auters edifizis da valur istoric-culturala, l'installaziun da museums locals e regiunals, il mantegniment da mulins, resgias, punts da lain e da crap, fortezzas e chastels, il sustegniment da mesiras spezialas per promover la diversitad linguistica sco p.ex. manuals rumantschs, projects spezials da la Pro Grigioni Italiano u da l'Uniun dals Gualsers, la promoziun da scolas da musica, da bibliotecas regiunalas e localas sco er d'uniuns da teater e d'implants da temp liber.

La Pro Patria gida a finanziar projects che fissan senza ses sustegn be stentusamain u insumma betg realisabels. Perquai è sia activitad considerablamain pli gronda en las regiuns muntagnardas ed en las regiuns economicamain dischavantagiadas ch'en las aglomeraziuns economicamain fermas da la Bassa. En quest senn sa resulta ina redistribuziun dals meds finanzials collectads. En ils chantuns bainstants vegnan investads en media tranter 20 e 50% dals retgavs da las collectas fatgas en quests chantuns, en chantuns sco il Grischun percunter trais fin tschintg giadas dapli. Ina autonomia finanziala da las regiuns ("il retgav resta tar nus") pudess bain esser interessanta per las instituziuns activas sin plaun regiunal, per in chantun sco il Grischun fiss ina tala da grond dischavantatg.

La solidaritad da la Pro Patria cun las regiuns muntagnardas vegn respundida cun la solidaritad da las volutarias e dals voluntaris e da la populaziun. En il Grischun è la prontadad da participar a las collectas spezialmain plaschaivla. Il departament d'educaziun chantunal sustegna l'engaschament da la Pro Patria cun recumandar la collecta a las scolas e la populaziun demussa gronda simpatia. Perquai surpassa en il Grischun il retgav per chau da la populaziun la media svizra.